اڈیالہ جیل میں جمعرات کو بانی پی ٹی آئی عمران خان سے پارٹی رہنمائوں کی ملاقات کا دن تھا مگر کوئی رہنماء ان سے ملنے اڈیالہ جیل نہیں پہنچا۔ اڈیالہ جیل ذرائع کے مطابق پی ٹی آئی رہنماء سلمان اکرم راجہ نے جیل حکام سے ٹیلی فون پر رابطہ کیا مگر سلمان اکرم راجہ کو ملاقات سے متعلق کچھ نہ بتایا گیا۔ اس حوالے سے بانی پی ٹی آئی کے وکیل فیصل چوہدری نے سپرنٹنڈنٹ کو بذریعہ واٹس ایپ درخواست کی کہ بانی پی ٹی آئی کی خیریت سے متعلق شدید تشویش ہے، ان سے فوری ملاقات کروائی جائے۔ دوسری جانب ذرائع نے بتایا ہے کہ اڈیالہ جیل حکام نے کہا کہ بانی پی ٹی آئی جیل حکام کی تحویل میں نہیں ہیں بلکہ وہ جسمانی ریمانڈ پر راولپنڈی پولیس کی حراست میں ہیں، بانی پی ٹی آئی کے سیل کو راولپنڈی تھانہ نیوٹائون کاحصہ قرار دیا گیا تھا ،ملاقات کرانے یا نہ کرانے کا اختیار اب جیل انتظامیہ کے پاس نہیں ہے، ملاقات کیلئے ان سے رابطہ کیا جائے۔
