وفاقی وزیر اطلاعات ونشریات عطااللہ تارڑ نے کہا ہے کہ مہنگائی کم ہو نہیں رہی بلکہ ہو چکی ۔ پی ٹی آئی والے گولی کیوں چلائی کا بیانیہ چلا رہے ہیں ، یہ گولی چلانے نہیں ٹرخانے کا بیانیہ ہے ۔ لطیف کھوسہ نے کہا سینکڑوں لاشیں میرے گھر پر پڑی ہیں ہیں جبکہ بیرسٹر گوہر کہتے ہیں صرف بارہ افراد مارے گئے ۔ میڈیا سے گفتگو کرتے ہوے انہوں نے کہا مہنگائی 70 ماہ کی کم ترین سطح پر آ گئی ہے۔ مہنگائی کا کم ہونا اس بات کی دلیل ہے کہ ہماری معیشت ترقی کر رہی ہے۔ زرمبادلہ کے ذخائر 11 ارب ڈالر سے تجاوز کر گئے ہیں۔ کنزیومر پرائس انڈیکس ہر ماہ نیچے جا رہا ہے۔ اسٹاک مارکیٹ ایک لاکھ پوائنٹس کی حد عبور کر چکی ہے۔ شرح سود کم ہو کر 15 فیصد پر چلی گئی ہے۔ انہوں نے کہا شرح سود کم ہونے سے ملک میں سرمایہ کاری میں اضافہ ہو رہا ہے۔ وزیراعظم محمد شہباز شریف کی دن رات محنت اور کوششوں کی بدولت مہنگائی میں کمی واقع ہوئی ہے ۔ انہوں نے کہا مہنگائی کم ہو نہیں رہی کم ہو چکی ۔ ہم ڈیفالٹ کے د ہانے سے اس مقام پر پہنچے ہیں۔ ایم ڈی آئی ایم ایف نے بھی کہا تھا کہ وزیراعظم محمد شہباز شریف اگر اس معاملے کو سنجیدہ نہ لیتے تو ملک کا ڈیفالٹ سے بچنا ممکن نہیں تھا۔ انہوں نے کہا کہ ایک سیاسی جماعت ملک کو ڈیفالٹ کرانے کے لئے آئی ایم ایف کو خط لکھ رہی تھی، اس کے باوجود آج مہنگائی 4.8 فیصد، شرح سود 15 فیصد، ترسیلات زر 8.8 ارب ڈالر، زرمبادلہ کے ذخائر 11 ارب ڈالر ہو گئے ہیں۔ ترقی کا سلسلہ جاری ہے، سٹاک ایکسچینج کا ایک لاکھ پوائنٹس کی سطح عبور کرنا، تمام ریکارڈ توڑ دینا اس بات کی دلیل ہے کہ معیشت کی ترقی ہو گئی ہے۔ ان شاء االلہ معاشی ترقی میں مزید بہتری آئے گی۔ انہوں نے کہا تحریک انتشار گولی چلانے کا جھوٹا بیانیہ بنا رہی ہے۔ کوئی ایک ثبوت پیش کریں جس میں قانون نافذ کرنے والے اداروں کا کوئی اہلکار فائرنگ کرتا ہوا دکھائی دے۔ ان کے پاس کوئی ایک ویڈیو ثبوت موجود نہیں ہے۔ ایسا کوئی واقعہ پیش ہی نہیں آیا جس کے بارے میں یہ کوئی ثبوت پیش کر سکیں۔ انہوں نے کہا ایک شخص کے بھاگنے کی ویڈیو سامنے آئی جس میں وہ کہہ رہا ہے کہ مجھے گولی لگ گئی، یہ ویڈیو وائرل بھی ہوئی۔ یہی شخص ایک دوسری ویڈیو میں کہتا ہے کہ میرے ہاتھ پر چوٹ آئی ہے۔ اس شخص نے اپنے ہاتھ سے پٹی کھول کر ویڈیو میں دکھائی جس میں اس کے ہاتھ پر گولی کا کوئی نشان نظر نہیں آیا۔ یہ وہ لوگ ہیں جو جھوٹ پر ریاست کو بدنام کرتے ہیں۔ انہوں نے کہا پی ٹی آئی لاشوں پر جھوٹ پھیلا رہی ہے۔ لطیف کھوسہ نے کہا کہ ان کے گھر پر کئی لاشیں موجود ہیں۔ بیرسٹر گوہر نے کہا کہ سب غلط ہے 12 لاشیں ہیں۔ لاش ایک بھی نہیں، ہوتی تو سامنے آ جاتیں۔ یہ لاشیں صرف ٹک ٹاک، فیس بک، ایکس، واٹس اپ پر ملیں گی۔ انہوں نے کہا قوم کے ساتھ بھونڈا مذاق کیا جا رہا ہے۔ قوم کی بدقسمتی ہے کہ ایسے لوگ سیاسی جماعتیں بنا لیتے ہیں جنہیں کوئی عقل اور فہم نہیں ہے۔ پولیس اور رینجرز کے چار جوان شہید ہوئے، ان کے خاندانوں کے ساتھ کسی نے اظہار ہمدردی نہیں کیا۔ انہوں نے کہا یہ سیکورٹی فورسز اور پولیس کے جوانوں کو نشانہ بناتے ہیں۔ پی ٹی آئی نوسربازوں کی جماعت ہے۔ ایک شخص نے ویڈیو پیغام دیا کہ اس کے بیٹے کو شہید کرنے کی غلط اطلاعات پھیلائی گئیں، اس نے تردید کی اور کہا کہ یہ فیک نیوز ہے اور میرا بیٹا گھر پر بیٹھا ہے۔ انہوں نے کہا پی ٹی آئی کا پرامن احتجاج نہیں تھا، یہ اسلحہ سے لیس جتھہ تھا جو یہاں پر دھاوا بولنا چاہ رہا تھا۔ یہ اپنی شرمندگی چھپانے کے لئے لاشوں کی سیاست کر رہے ہیں۔ یہ آپس کی لڑائی میں بدست و گریبان ہیں۔
