اسلام آباد ..اینڈرائیڈ ایپس کے ذریعے سرکاری افسران کو ہدف بناکر ڈیٹا چوری کیے جانے کا انکشاف ہوا ہے، نیشنل کمپیوٹر ایمرجنسی رسپانس ٹیم (این سی ای آر ٹی) نے اس حوالے سے ایڈوائزری جاری کردی ہے۔ این سی ای آر ٹی کی ایڈوائزری میں کہا گیا ہے کہ گوگل پلے اسٹور پر موجود کچھ مشتبہ اپپس پاکستانی آفیشلز کو نشانہ بنانے میں ملوث پائی گئی ہیں، یہ ایپس صارفین کی رضامندی سے ذاتی اور مالی ڈیٹا چوری کرتی ہیں۔ایڈوائزری کے مطابق ’یہ ایپس میڈیا فائلز، رابطوں کی فہرست، کالز اور پیغام کے لاگز چوری کرنے میں ملوث ہیں،کچھ ایپلی کیشنز پاکستانی صارفین کی ذاتی معلومات کو مالی فوائد کے لیے پیش کرتی ہیں۔این سی ای آر ٹی نے کہا ہے کہ متعدد صارفین نادانستہ طور پر ایپس کو حساس ڈیٹا تک رسائی کی اجازت دیتے ہیں، صارفین صرف مستند ذرائع سے ایپس انسٹال کریں اور غیر ضروری رسائی کو روکنے کیلئے ایپ کی اجازتوں کا باقاعدہ جائزہ لیں۔ایڈوائزری میں کہا گیا ہے کہ ڈیٹا چوری سے بچنے کے لیے مضبوط پاس ورڈ اور ملٹی فیکٹر تصدیق کی جائے، صارفین متعبر اینٹی وائرس اور اینٹی مالویئر سافٹ ویئر انسٹال ضرور کریں۔صارفین کو لوکیشن سروسز ضرورت نہ ہونے پر بند رکھنی چاہیے، صارفین حساس ماحول میں اسمارٹ فونز استعمال کرنے سے گریز کریں۔ایڈوائزری میں کہا گیا ہے کہ شہری، سرکاری افسران سائبر سیکورٹی حملوں سے بچنے کے لیے احتیاطی تدابیر پر لازمی عمل کریں۔
