وزیر اعظم شہباز شریف نے پاکستان مسلم لیگ (ن) کے صدر نواز شریف سے جاتی امرا رائے ونڈ میں ملاقات جس میں ملک کی مجموعی سیاسی صورتحال پر تبادلہ خیال کیا گیا ۔ ذرائع کے مطابق وزیر اعظم شہباز شریف نے صدر مسلم لیگ (ن) نواز شریف کو دورہ سعودی عرب سے متعلق آگاہ کیا ۔ وزیراعظم شہباز شریف نے نواز شریف کو مدارس بل پر بھی اعتماد میں لیا ۔ وزیر اعظم شہباز شریف کی پارٹی صدر نواز شریف سے ملاقات ڈھائی گھنٹے تک جاری رہی ۔میڈیا رپورٹ کے مطابق ملاقات کے دوران دونوں رہنمائوں نے اتفاق کیا کہ قومی سلامتی ویکجہتی کو نقصان پہنچانے والوں کا محاسبہ کیا جائے گا اور کسی کو ملکی ترقی کی راہ میں رکاوٹ ڈالنے نہیں دیں گے۔ملاقات میں 26 نومبر کے واقعات اور بانی پی ٹی آئی کی سول نافرمانی کی ممکنہ کال پر بھی گفتگو کی گئی اورملکی معاملات پر حکومتی اتحادیوں سے مشاورت اور انہیں اعتماد میں لینے پر بھی اتفاق ہوا۔نوازشریف کی جانب سے وزیراعظم شہباز شریف کو ملکی معاشی صورتحال میں بہتری پر مبارکباد پیش کی گئی اور وزیراعظم نے بیرونی سرمایہ کاری میں اب تک کی پیشرفت سے آگاہ بھی کیا۔دونوں رہنمائوں نے جاتی امرا ء میں والدین کی قبروں پر حاضری دے کر فاتحہ خوانی بھی کی۔
