اسلام آباد (جہان امروز نیوز)فتنہ الخوارج کے دہشت گردوں نے لکی مروت کے علاقے کبل خیل میں 17سویلین ورکرز کو اغوا کرلیا، سیکیورٹی فورسز نے 8مغوی ورکرز کو بحفاظت بازیاب کرالیا۔نجی ٹی وی نے ذرائع کے حوالے سے بتایا ہے کہ جمعرات کو فتنہ الخوارج کے دہشت گردوں نے ضلع لکی مروت کے علاقے کبل خیل سے 17سویلین ورکرز کو بھتہ خوری کیلئے اغواء کر لیا اور مقامی ٹھیکیدار کی گاڑی کو بھی آگ لگا دی۔سیکیورٹی فورسز اور قانون نافذ کرنے والے اداروں نے کارروائی کرتے ہوئے 8مغوی ورکرز کو بحفاظت باز یاب کروا لیا جبکہ باقی نہتے ورکرز کی بازیابی کیلئے آپریشن جاری ہے۔ ذرائع کے مطابق فتنہ الخوارج کی پاکستان اور عوام دشمن بہیمانہ کارروائیوں کا دین اور اسلامی اقدار سے کوئی تعلق نہیں، بہیمانہ اقدام کرنے والے عناصر کو کیفر کردار تک پہنچایا جائے گا۔
