آئینی بینچ نے لطیف کھوسہ کی زیرحراست افراد کو عام جیلوں میں منتقل کرنے کی استدعا مسترد کردی
اسلام آباد (انٹرنیوز) سپریم کورٹ کے آئینی بینچ نے خصوصی عدالتوں میں سویلنز کے ٹرائل کیس میں زیرحراست افراد کو عام جیلوں میں منتقل کرنے کی استدعا مسترد کرتے ہوئے کیس کی سماعت جمعرات تک ملتوی کردی۔ منگل کو سپریم کورٹ میں جسٹس امین الدین خان کی سربراہی میں 7رکنی آئینی بینچ نے خصوصی عدالتوں میں سویلنز کے ٹرائل کیس پر سماعت کی،اس دوران ایڈیشنل اٹارنی جنرل نے سماعت ملتوی کرنے کی استدعا کرتے ہوئے بتایا کہ وزارت دفاع کے وکیل خواجہ حارث بیمار ہیں، ان کے معدے میں تکلیف ہے جس کے باعث وہ پیش نہیں ہوسکتے۔دوران سماعت وکیل لطیف کھوسہ نے زیرحراست افراد کو عام جیلوں میں منتقل کرنے کی استدعا کرتے ہوئے موقف اپنایا کہ جیلوں میں کم از کم ملاقات تو ہوسکتی ہے تاہم عدالت نے وکیل لطیف کھوسہ کی استدعا مسترد کردی۔جسٹس امین الدین خان نے کہا کہ ملاقات کے حوالے سے اٹارنی جنرل یقین دہانی کروا چکے ہیں، مقدمہ سن رہے ہیں فی الحال کسی اور طرف نہ جائیں۔بعد ازاں کیس کی سماعت جمعرات تک ملتوی کر دی گئی۔
