اسلام آباد راولپنڈی کے مختلف علاقوں سے 60افغان باشندے گرفتار
لنڈی کوتل میں عارضی کیمپ منتقلی کے بعد بائیومیٹرک کرکے واپس بھیجا جائے گا
غیر ملکیوں کی ملک بدری کے پلان کا دوسرا مرحلہ شروع کرتے ہوئے اسلام آباد راولپنڈی کے مختلف علاقوں سے 60افغان باشندے حراست میں لئے گئے ہیں جنہیں لنڈی کوتل میں عارضی کیمپ منتقلی کے بعد بائیومیٹرک کرکے واپس بھیجا جائے گا جبکہ پی او آرکارڈ رکھنے والے افغان باشندے 30جون تک پاکستان میں رہ سکتے ہیں۔
تفصیل کے مطابق افغان سٹیزن کارڈ ہولڈرز کی رضاکارانہ واپسی کی مدت ختم ہونے کے بعدایکشن شروع کردیا گیا ہے۔اسلام آباد راولپنڈی میں خفیہ اطلاعات پر کارروائیاں،60باشندے زیر حراست لئے گئے ہیں۔ ذرائع کے مطابق جڑواں شہروں میں کارروائیاں پولیس اور حساس اداروں نے مل کر کی،اسلام آباد کے ترنول،بھارہ کہو،غوری ٹاؤن اور میرآبادی میں سرچ آپریشن کیا گیا اورافغان سیٹیزن کارڈ رکھنے والے 22 باشندوں کو حراست میں لیا گیا،راولپنڈی کی فوجی کالونی اور ملحقہ علاقوں سے 38 افراد کو پکڑا گیا،ذرائع کے مطابق تمام افغان باشندے پرانا حاجی کیمپ میں واقعے عارضی کیمپ میں منتقل کئے گئے ہیں ۔
عارضی کیمپ میں رجسٹریشن کے بعد تمام افراد کو لنڈی کوتل لے جایا جائے گا،لنڈی کوتل کیمپ میں افغان باشندوں کی بائیومیٹرک کے بعد وطن واپسی ہوگی۔ذرائع کے مطابق پہلے مرحلے میں فارن ایکٹ کے تحت گرفتار افغان باشندوں کو بھجوایا جائے گا،جیلوں میں بند افغان باشندوں کو لنڈی کوتل کیمپ منتقل کردیا جائے گا، ملک میں سب سے زیادہ افغان باشندے صوبہ خیبر پختونخوا میں مقیم ہیں۔پی او آر کارڈ رکھنے والے باشدے 30 جون 2025 تک پاکستان میں رہ سکتے ہیں۔
