پہلے مرحلے میں71 ہزار سے زائد درخواستیں آن لائن پورٹل اور بینکوں کے ذریعے جمع کرائی گئیں
اسلام آباد (جہان امروز-نیوز)وزارتِ مذہبی امور و بین المذاہب ہم آہنگی نے حج 2026 کی درخواستوں کی وصولی کے دوسرے مرحلے کا آغاز کر دیا ہے، جو 11 اگست سے 16 اگست تک جاری رہے گا۔
وزارت کے ترجمان محمد عمر بٹ نے ایک بیان میں بتایا کہ ہفتے کے روز وزارت نے آئندہ سال کے حج کے لیے پہلے مرحلے کو کامیابی سے مکمل کرلیا تھا، جس میں 71 ہزار سے زائد درخواستیں آن لائن پورٹل اور مقررہ بینکوں کے ذریعے جمع کرائی گئیں۔رپورٹ کے مطابق دوسرے مرحلے میں (جو آئندہ ہفتے تک جاری رہے گا) غیر رجسٹرڈ خواہشمند عازمین بھی اپنی درخواستیں جمع کرا سکتے ہیں، درخواستوں کی وصولی کا عمل وزارت کے آن لائن پورٹل اور مقررہ بینکوں کے ذریعے جاری رہے گا۔
رپورٹ میں کہا گیا کہ اوورسیز پاکستانی بھی مقررہ بینکوں کے ذریعے اپنے قریبی رشتہ دار کے توسط سے حج کے لیے درخواست دے سکتے ہیں، جو لوگ بیرونِ ملک مقیم ہیں، انہیں پاکستان پہنچنے پر اپنا میڈیکل فٹنس سرٹیفکیٹ جمع کرانا ہوگا۔حج اسلام کے بنیادی ارکان میں سے ایک ہے، جو ہر سال دنیا بھر کے لاکھوں مسلمان ادا کرتے ہیں، پاکستان کو سعودی عرب کی جانب سے سب سے بڑے حج کوٹے میں سے ایک ملتا ہے۔
گزشتہ ماہ وفاقی کابینہ نے باضابطہ طور پر حج پالیسی 2026 کی منظوری دی تھی، جس میں حج سیزن کے لیے اہم طریقہ کار، مالی اور لاجسٹک اقدامات بیان کیے گئے تھے۔وفاقی وزیر مذہبی امور و بین المذاہب ہم آہنگی، سردار محمد یوسف نے ایک پریس کانفرنس میں بتایا تھا کہ سعودی عرب نے پاکستان کیلئے کل ایک لاکھ 79 ہزار 210 عازمین کا کوٹہ مختص کیا ہے، (ایک لاکھ 19 ہزار 210 سرکاری اسکیم کے تحت اور 60 ہزار نجی آپریٹرز کے لیے) جو سعودی حکام کی حتمی منظوری سے مشروط ہے۔انہوں نے کہا کہ سرکاری اسکیم میں روایتی 38 تا 42 روزہ پیکج کے ساتھ ساتھ مختصر 20 تا 25 روزہ آپشن بھی دیا جائے گا،تخمینی اخراجات 11 لاکھ 50 ہزار سے 12 لاکھ 50 ہزار روپے کے درمیان ہوں گے، جو سروس فراہم کرنے والوں کے ساتھ طے پانے والے معاہدوں پر منحصر ہوگا۔
