کوئٹہ(جہان امروز- نیوز)وزیر اعلیٰ بلوچستان میر سرفراز بگٹی کی زیر صدارت اجلاس میں صوبے کے پہلے صوبائی بینک “بینک آف بلوچستان کے قیام کی منظوری دے دی گئی۔ اجلاس میں بینک سے متعلق ابتدائی فزیبلٹی رپورٹ پیش کی گئی جسے قابلِ عمل قرار دیتے ہوئے وزیر اعلیٰ نے ایک ہفتے کے اندر آپریشنل پلان مرتب کرنے کی ہدایت جاری کی۔
وزیر اعلیٰ میر سرفراز بگٹی نے کہا کہ بینک آف بلوچستان کے قیام سے عوام، تاجروں اور سرمایہ کاروں کو معیاری اور جدید بینکنگ سہولیات فراہم ہوں گی۔ انہوں نے کہا کہ بلوچستان کے عوام کو جلد خوشخبری سننے کو ملے گی، اس منصوبے کے ذریعے صوبے میں معاشی سرگرمیوں کو فروغ ملے گا اور نوجوانوں کو روزگار کے نئے مواقع میسر آئیں گے۔
ان کا مزید کہنا تھا کہ بینک آف بلوچستان صوبے کی معیشت میں تاریخی سنگِ میل ثابت ہوگا اور صوبائی وسائل کو بروئے کار لا کر ترقیاتی منصوبوں کی رفتار کو مزید تیز کیا جائے گا۔
اجلاس میں صوبائی وزیر خزانہ میر شعیب نوشیروانی، چیف سیکرٹری بلوچستان شکیل قادر خان، پرنسپل سیکرٹری بابر خان سمیت دیگر اعلیٰ حکام شریک ہوئے جبکہ بینکنگ سیکٹر کے ماہرین نے آن لائن شرکت کی۔ اجلاس میں اتفاق کیا گیا کہ بینک آف بلوچستان کے قیام کے منصوبے کو جلد فعال بنایا جائے گا۔
