کوئٹہ(جہان امروز- نیوز ) بلوچستان میں سیکیورٹی فورسز کی انٹیلیجنس بیسڈ کارروائیاں کامیابی سے جاری ہیں۔
بولان کے پہاڑی علاقوں میں دہشتگردوں کے خلاف تازہ کارروائی میں مزید 16 دہشتگرد ہلاک ہو گئے، جس کے بعد مجموعی تعداد 82 ہو گئی۔
فورسز نے دہشتگردوں کے ٹھکانے تباہ کر کے بڑے حملوں کی سازش ناکام بنا دی۔سیکیورٹی ذرائع کے مطابق بولان کے پیر اسماعیل زیارت پہاڑی علاقوں میں خفیہ اطلاعات کی بنیاد پر کارروائی کے دوران دہشتگردوں کے قبضے سے بھاری مقدار میں جدید اسلحہ، گولہ بارود اور بارودی مواد برآمد ہوا۔
دہشتگردوں کا تعلق فتنہ الہندوستان سے تھا اور وہ ٹرین حملوں، بم دھماکوں اور شہریوں کے قتل میں ملوث تھے۔گزشتہ روز سے اب تک کیچ میں 13، مستونگ میں 7، تمپ میں اہم کمانڈر سمیت 5، پنجگور و تربت میں 11 اور مچھ کے پہاڑی علاقوں میں 30 دہشتگرد مارے گئے۔
آپریشنز کے دوران دہشتگردوں کے متعدد ٹھکانے تباہ کیے گئے اور بھاری مقدار میں اسلحہ، گولہ بارود اور دھماکہ خیز مواد برآمد ہوا۔پنجگور اور تربت کے مختلف علاقوں میں مشترکہ کارروائی کے دوران 11 دہشتگرد مارے گئے جو معصوم شہریوں کے قتل اور دہشتگردانہ کارروائیوں میں ملوث تھے۔
کیچ کے تمپ علاقے میں کالعدم تنظیم کے اہم کمانڈر زاہد صالح عرف واحد عرف بھوانی سمیت 5 دہشتگرد ہلاک ہوئے، جن کے قبضے سے بھاری اسلحہ اور دھماکہ خیز مواد برآمد ہوا۔مستونگ کے علاقے اسپلنجی میں خفیہ اطلاع پر آپریشن کے دوران 7 دہشتگرد ہلاک ہوئے اور ان کے ٹھکانے تباہ کر دیے گئے۔
سرچ آپریشن تاحال جاری ہے تاکہ علاقے کو مکمل طور پر کلیئر کیا جا سکے۔ سیکیورٹی ذرائع نے بتایا کہ کارروائی کے نتیجے میں دہشتگرد نیٹ ورک کو شدید دھچکا لگا اور ان کی سرگرمیاں مفلوج ہو گئی ہیں۔
