قتل ‘ راہزنی میں ملوث 216پاکستانی شہریوں کے پاسپورٹ بلاک ہوئے، ذرائع وزارت داخلہ
اسلام آباد..وزارت داخلہ نے متحدہ عرب امارات میں قید 4ہزار 700پاکستانیوں کے پاسپورٹس بلاک کر دیئے۔ذرائع وزارت داخلہ کے مطابق متحدہ عرب امارات میں مختلف جرائم میں 5292پاکستانی شہری قید ہیں جن میں سے 4700پاکستانیوں کے پاسپورٹ بلاک کر دیئے گئے ہیں۔ذرائع نے بتایا کہ یو اے ای کی جانب سے شہریوں کے مختلف جرائم میں ملوث ہونے کی تفصیل دیئے جانے پر ان کے پاسپورٹس بلاک کیے گئے ہیں۔منشیات کے جرائم میں ملوث 2470افراد جبکہ فراڈ، دھوکہ دہی اور جنسی ہراسانی میں ملوث 100اور چوری کے جرم میں قید 704پاکستانیوں کے پاسپورٹ بلاک کئے گئے۔قتل اور راہزنی میں ملوث 216پاکستانی شہریوں کے پاسپورٹ بھی بلاک کیے گئے۔ذرائع نے بتایا کہ غیر قانونی طور پر یو اے ای میں رہائش پزیر 375پاکستانیوں کے پاسپورٹ بلاک کیے گئے ہیں۔
