ڈیرہ بگٹی، فائرنگ سے 2 افرادزخمی ، قلعہ عبداللہ بازار میں ٹرالر کی زد میں آکر 12 سالہ بچہ جاں بحق

ڈیرہ بگٹی،قلعہ عبداللہ..ڈیرہ بگٹی میں نامعلوم افراد کی فائرنگ سے 2افرادزخمی ہوگئے۔ تفصیلات کے مطابق جمعہ کو ڈیرہ بگٹی کے علاقے سوئی بازار میں نامعلوم افراد نے فائرنگ کرکے کمانڈر بگی لنڈکانی کے دو بھائیوں پیروخان لنڈکانی بگٹی اور جھنڈا خان لنڈکانی بگٹی کو زخمی کردیا اور موقع سے فرار ہوگئے لیویز نے زخمیوں کو ہسپتال پہنچادیا اورمزید کارروائی شروع کردی۔

دوسری جانب قلعہ عبداللہ کے بازار میں ایک ٹرالر کی زد میں آکر 12 سالہ بچہ جاں بحق ہوگیا۔ جاں بحق ہونے والے بچے کی شناخت عبد النافع ولد عبد الغنی سکنہ ریلوے اسٹیشن قلعہ عبداللہ کے نام سے ہوئی ہے۔

واقعے کے بعد ایس ایچ او سید حلیم آغا نے پولیس فورس کے ہمراہ فوری کارروائی کی اور ٹرالر کے ڈرائیور محمد رسول ولد نعمت اللہ سکنہ کوہٹہ کو گرفتار کر لیا۔ پولیس نے مقدمہ درج کرکے مزید تحقیقات شروع کر دی ہیں۔