رمضان میں بھی فلسطین پر اسرائیلی حملے جاری، 2 فلسطینی شہید، متعدد زخمی
غزہ…غزہ میں اسرائیل کی جانب سے جنگ بندی معاہدے کی خلاف ورزیاں جاری ہیں اور رفح میں کیے گئے ڈرون حملے میں 2 فلسطینی شہید جبکہ کئی زخمی ہوئے ہیں۔میڈیا رپورٹس کے مطابق جنگ بندی سے اب تک غزہ میں 58 افراد شہید ہوچکے ہیں جن میں 10 بچے بھی شامل ہیں، اس کے ساتھ ساتھ اسرائیل کی جانب سے لبنان میں بھی جنگ بندی کی خلاف ورزیاں جاری ہیں اور آدھے گھنٹے کے دوران 15 حملے کیے گئے۔
دوسری طرف اسرائیل کی جانب سے غزہ میں امدادی سامان کے داخلے پر پابندی کی وجہ سے قحط کا امکان پیدا ہوگیا ہے۔ عالمی ممالک کی جانب سے اسرائیل پر غزہ میں سامان کی ترسیل کی اجازت دینے کے مطالبے کے باوجود امدادی سامان کے داخلے پر پابندی جاری ہے اور فلسطینی مسلمانوں کو ماہ رمضان میں اشیائے خورونوش کی کمی کا سامنا ہے۔اس پابندی کے بعد یمن کے حوثی باغیوں کی جانب سے اسرائیل کو 4 دنوں کی مہلت دی گئی ہے، باغیوں نے کہا ہے کہ اسرائیل غزہ میں امدادی سامان کے داخلے پر پابندی ختم کرے یا پھر دوبارہ سے بحری حملوں کے لیے تیار ہوجائے۔
