پاکستان سمیت دنیا بھر میں مٹی کی اہمیت کا عالمی دن5دسمبرجمعرات کو منایا جائے گا۔اس دن کے منانے کا مقصد کسانوں میں زرخیر مٹی اور صحت مند زمین کی اہمیت کے متعلق شعور اجاگر کرنا ہے۔ایک رپورٹ کے مطابق پاکستان سمیت دنیا بھر میں کیمیائی کھادوں کے لگاتاراور ضرورت سے زیادہ استعمال سے مٹی میں طبعی تبدیلیاں واقع ہو رہی ہیں اور زمین بنجر ہونے کے قریب ہے۔اقوام متحدہ کے زیر اہتمام پاکستان سمیت دنیا بھر میں ہر سال5دسمبر کوکسانوں میں مٹی اور زمین کی اہمیت اجاگر کرنے کیلئے مٹی کی اہمیت کا عالمی دن منایا جاتا ہے۔مٹی سے محبت انسان کی فطرت میں شامل ہے کیونکہ وہ خود مٹی ہی کی پیداوار ہے۔ہماری 95 فیصد غذا مٹی سے ہی حاصل ہوتی ہے۔ صنعتی انقلاب نے انسان کی زندگی آسائشوں سے بھر دی ہے لیکن اس کا خمیازہ زمین پر بے جا کیمکل اسپرے سے پیداوار تو بڑھائی جارہی ہے تاہم اس میں سے غذائیت کا عنصر کم ہوتا جارہا ہے اس لیے ہم سب کو مل کر اپنے ماحول اور مٹی کی حفاظت کے لیے کام کرنا ہے۔ ماہرین کا خیال ہے کہ انسان کی بڑھتی ہوئی آبادی کے سبب دنیا سے مٹی کی مقدار کم ہورہی ہے جس کا اثر نہ صرف انسانوں بلکہ جانوروں، درختوں اور موسموں پر بھی پڑرہا ہے۔
