اسلام آباد(جہان امروز) کشمیری عوام کے حق خودارادیت کے عالمی دن کے موقع پرجمعیت علماء اسلام کے سربراہ مولانا فضل الرحمان نے کہاہے کہ کشمیری عالمی سطح پر تسلیم شدہ اپنے حق خود ارادیت کے حصول تک اپنی جدوجہد جاری رکھیں گے۔
انہوں نے کہاکہ اقوام متحدہ کی قرارداد پر عملدرآمد میں بھارت کامنفی رویہ اور ہٹ دھرمی رکاوٹ ہے اقوام متحدہ کشمیر میں استصواب رائے کے حوالے سے اپنی ذمہ داریاں پوری کرنے میں ناکام رہا ہے.
انہوں نے کہاکہ کشمیری مسلمان اس وقت بھارت کی طرف سے بدترین سفاکیت اور نسل کشی کا شکار ہیں اور 7 دہائیاں گذرنے کے باوجود اقوام متحدہ کی جانب سے 1948اور 1949 کی قراردادوں پر عملدرآمد کیلئے کوئی ٹھوس اقدامات نہیں کئے گئے.
کشمیریوں کی جدوجہد آزادی میں ان کے شانہ بشانہ کھڑے ہیں اور یہ مطالبہ کرتے ہیں کہ کشمیریوں کے حق خور ارادیت کے مطالبے کو تسلیم کیا جائے سربراہ جے یو آئی نے کہاکہ بھارت کے کشمیر پر غاصبانہ تسلط کا عالمی برادری نوٹس لے ہم کشمیریوں کے ساتھ بھرپور یکجہتی کا اظہار کرتے ہیں۔۔
