تجزیہ بی این پی
مالی سال 2026ء کے دوران نان ٹیکسٹائل برآمدات میں آنے والی کمی بلاشبہ تشویش کا باعث ہے، تاہم اس صورتحال کو صرف منفی زاویے سے دیکھنے کے بجائے اسے اصلاحات، نئی منصوبہ بندی اور برآمدی شعبے کو مزید متنوع بنانے کے ایک اہم موقع کے طور پر بھی دیکھا جا سکتا ہے۔ وفاقی ادارہ? شماریات کے اعداد و شمار کے مطابق نان ٹیکسٹائل برآمدات میں تقریباً 14 فیصد کمی ریکارڈ کی گئی، جبکہ زرعی مصنوعات، قالین، کینوس کے جوتوں، خام چمڑے اور بعض دیگر شعبوں میں بھی برآمدات کم ہوئیں۔ یہ اعداد و شمار اس امر کی نشاندہی کرتے ہیں کہ پاکستان کو صرف ایک یا دو شعبوں پر انحصار کرنے کے بجائے اپنی مجموعی برآمدی حکمتِ عملی کو مزید مؤثر، جدید اور عالمی تقاضوں سے ہم آہنگ بنانے کی ضرورت ہے۔
پاکستان کی معیشت میں ٹیکسٹائل شعبہ ہمیشہ ریڑھ کی ہڈی کی حیثیت رکھتا ہے، لیکن دنیا کی کامیاب معیشتیں صرف ایک صنعت پر انحصار نہیں کرتیں بلکہ مختلف شعبوں میں برآمدی صلاحیت پیدا کرکے معاشی استحکام حاصل کرتی ہیں۔ یہی وجہ ہے کہ آج پاکستان کے لیے بھی یہ مناسب وقت ہے کہ زراعت، فوڈ پروسیسنگ، انجینئرنگ، آئی ٹی، سرجیکل آلات، لیدر، کھیلوں کا سامان، معدنیات اور حلال فوڈ انڈسٹری جیسے شعبوں کو قومی برآمدی حکمتِ عملی کا لازمی حصہ بنایا ائے۔
تجزیہ بی این پی کے مطابق نان ٹیکسٹائل برآمدات میں کمی کو بحران کے بجائے اصلاحات کی ضرورت کے اشارے کے طور پر دیکھا جانا چاہیے۔ اگر حکومت، نجی شعبہ اور برآمد کنندگان مشترکہ حکمتِ عملی اختیار کریں تو یہی شعبے آئندہ چند برسوں میں ملک کے لیے اربوں ڈالر کا اضافی زرِ مبادلہ کما سکتے ہیں۔ عالمی منڈی میں خوراک، ویلیو ایڈڈ زرعی مصنوعات، طبی آلات، حلال مصنوعات اور ماحول دوست صنعتی اشیا کی طلب مسلسل بڑھ رہی ہے، جس سے پاکستان بھرپور فائدہ اٹھا سکتا ہے۔
خصوصی طور پر زرعی شعبہ پاکستان کی سب سے بڑی معاشی طاقت ہے۔ ملک کے مختلف خطے اعلیٰ معیار کی گندم، چاول، آم، کینو، سبزیاں، پھل، دالیں اور دیگر زرعی اجناس پیدا کرتے ہیں، مگر ان میں سے بڑی مقدار خام شکل میں برآمد کی جاتی ہے۔ اگر انہی مصنوعات کی پروسیسنگ، پیکنگ، برانڈنگ اور ویلیو ایڈیشن پر توجہ دی جائے تو برآمدی آمدن میں نمایاں اضافہ ممکن ہے۔ دنیا بھر میں تیار شدہ خوراک، آرگینک مصنوعات اور پریمیم فوڈ برانڈز کی مانگ میں مسلسل اضافہ ہو رہا ہے، جس سے پاکستانی برآمد کنندگان فائدہ اٹھا سکتے ہیں۔
اسی طرح سرجیکل آلات کا شعبہ پاکستان کی بین الاقوامی شناخت رکھتا ہے۔ سیالکوٹ میں تیار ہونے والے طبی آلات دنیا کے متعدد ممالک میں استعمال کیے جاتے ہیں۔ ضرورت اس امر کی ہے کہ پاکستانی کمپنیاں صرف دیگر عالمی برانڈز کے لیے پیداوار تک محدود نہ رہیں بلکہ اپنی مصنوعات کو عالمی سطح پر “میڈ اِن پاکستان” کے نام سے متعارف کرائیں۔ اس مقصد کے لیے تحقیق، جدید ٹیکنالوجی، بین الاقوامی سرٹیفکیشن، مارکیٹنگ اور برانڈنگ پر سرمایہ کاری ناگزیر ہے۔
چمڑے، کھیلوں کے سامان اور قالین سازی کی صنعتیں بھی پاکستان کی روایتی برآمدی طاقت ہیں۔ اگر جدید ڈیزائن، عالمی فیشن ٹرینڈز، ای کامرس پلیٹ فارمز اور ڈیجیٹل مارکیٹنگ سے فائدہ اٹھایا جائے تو ان شعبوں میں بھی نمایاں پیش رفت کی جا سکتی ہے۔ آج دنیا کی بڑی منڈیاں آن لائن تجارت کی جانب منتقل ہو رہی ہیں، اس لیے پاکستانی صنعت کاروں کو بھی ڈیجیٹل برآمدی حکمتِ عملی اختیار کرنی ہوگی۔
حکومت کی جانب سے برآمدی صنعتوں کے لیے آسان قرضوں، توانائی کی مناسب قیمتوں، ٹیکس سہولتوں، کسٹمز اصلاحات اور نئی بین الاقوامی منڈیوں تک رسائی جیسے اقدامات بھی مثبت نتائج دے سکتے ہیں۔ سفارتی سطح پر تجارتی معاہدوں، تجارتی وفود اور سرمایہ کاری کے فروغ سے پاکستانی مصنوعات کو نئی مارکیٹیں میسر آ سکتی ہیں۔ اس کے ساتھ ساتھ چھوٹے اور درمیانے درجے کے برآمد کنندگان کی حوصلہ افزائی بھی ضروری ہے تاکہ ملکی برآمدی بنیاد مزید وسیع ہو سکے۔
تجزیہ بی این پی کے مطابق پاکستان کے پاس وسائل، افرادی قوت، زرعی استعداد، صنعتی مہارت اور جغرافیائی اہمیت جیسی بے شمار ایسی خصوصیات موجود ہیں جو اسے خطے کی مضبوط برآمدی معیشت بنا سکتی ہیں۔ ضرورت صرف اس امر کی ہے کہ طویل المدتی پالیسی، جدید ٹیکنالوجی، تحقیق، ویلیو ایڈیشن، معیار اور عالمی برانڈنگ کو قومی ترجیحات میں شامل کیا جائے۔ اگر یہ اقدامات تسلسل کے ساتھ کیے جائیں تو نان ٹیکسٹائل برآمدات میں موجودہ کمی عارضی ثابت ہو سکتی ہے اور آنے والے برسوں میں یہی شعبہ ملکی معیشت، روزگار، صنعتی ترقی اور زرمبادلہ کے ذخائر میں نمایاں اضافے کا ذریعہ بن سکتا ہے۔
پاکستان کے لیے یہ وقت مایوسی کا نہیں بلکہ اپنی برآمدی سمت کو مزید مضبوط، متوازن اور جدید خطوط پر استوار کرنے کا ہے۔ درست منصوبہ بندی، مؤثر پالیسیوں اور سرکاری و نجی شعبے کے باہمی تعاون سے نہ صرف نان ٹیکسٹائل برآمدات دوبارہ ترقی کی راہ پر گامزن ہو سکتی ہیں بلکہ پاکستان عالمی تجارت میں بھی اپنی مضبوط اور پائیدار جگہ بنا سکتا ہے۔
٭٭٭٭٭٭٭٭٭٭٭