کوئٹہ ائیرپورٹ روڈ پر کار اور موٹرسائیکل میں خوفناک تصادم،3 افراد جاں بحق، متعدد زخمی

کوئٹہ(جہان امروز )صوبائی دارالحکومت کوئٹہ میں ائیر پورٹ روڈ پر عسکری چیک پوسٹ کے قریب پیش آنے والے افسوسناک ٹریفک حادثے میں 3 افراد موقع پر جاں بحق جبکہ متعدد افراد زخمی ہو گئے ہیں۔

حادثہ ایک تیز رفتار کار اور موٹرسائیکل کے درمیان تصادم کے نتیجے میں پیش آیا، جس میں دو موٹرسائیکل سوار اور ایک کار سوار جاں بحق ہوا۔

واقعے کی اطلاع ملتے ہی ریسکیو ٹیمیں اور پولیس فوری طور پر جائے وقوعہ پر پہنچ گئیں اور لاشوں و زخمیوں کو سول ہسپتال منتقل کیا۔

طبی ذرائع کے مطابق بعض زخمیوں کی حالت نازک ہے جس کے باعث ہلاکتوں میں اضافے کا خدشہ ہے۔

ابتدائی تحقیقات کے مطابق حادثہ تیز رفتاری کی وجہ سے پیش آیا، تاہم پولیس نے واقعے کی مزید تحقیقات شروع کر دی ہیں۔

انتظامیہ نے شہریوں سے اپیل کی ہے کہ وہ حادثات سے بچنے کے لیے ٹریفک قوانین کی سختی سے پابندی کریں۔