کابینہ کمیٹی توانائی نے پاور ڈویژن کی جانب سے پیش کر دہ نیشنل الیکٹریسٹی پلان 2023ـ2027 میں ترامیم کی منظوری دیدی
اسلام آباد (پی آئی ڈی)وزیراعظم کی زیر صدارت کابینہ کمیٹی برائے توانائی نے پاور ڈویژن کی جانب سے پیش کر دہ نیشنل الیکٹریسٹی پلان 2023ـ2027 میں ترامیم کی منظوری دیدی ۔وزیراعظم محمد شہباز شریف کی زیر صدارت کابینہ کمیٹی برائے توانائی کا اجلاس منگل کو وزیراعظم ہاؤس اسلام آباد میں منعقد ہوا۔
کابینہ کمیٹی برائے توانائی کے اجلاس میں پاور ڈویژن کی جانب سے نیشنل الیکٹریسٹی پلان 2023ـ2027 میں ترامیم پیش کی گئیں۔ یہ ترامیم توانائی کیلئے مربوط منصوبہ بندی، بجلی کے پیداوار میں اضافے، دور دراز علاقوں میں قابل تجدید ذرائع سے پیدا کردہ بجلی کی فراہمی، بجلی کی کراس بارڈر تجارت، ترسیلی نظام میں وسعت، ٹیریف ڈیزائن، بجلی بچت، سسٹم اینڈ مارکیٹنگ آپریشنز ، خطرات کی نشان دہی اور اس حوالے سے انتظامی امور، ایندھن اور ٹیکنالوجی کی مقامی سطح پر استعداد بہتر بنانے ، ریسرچ و ڈویلپمنٹ اور ڈیجیٹائزیشن سے متعلق ہیں۔
کابینہ کمیٹی نے ان ترامیم کی منظوری دیتے ہوئے یہ ہدایت کی کہ ان ترامیم کے حوالے سے حکومت خیبر پختونخوا اور نیشنل الیکٹرک پاور ریگولیٹری اتھارٹی سے مزید مشاورت بھی کی جائے۔کابینہ کمیٹی برائے توانائی نے پاور ڈویژن کی جانب سے پیش کردہ مربوط توانائی پلان کے ہائی لیول ڈیزائن کی منظوری دے دی۔ مزکورہ توانائی پلان میں وفاقی اور صوبائی حکومتوں کے علاوہ دیگر اسٹیک ہولڈرز شامل ہوں گے۔
اس پلان کا مقصد انرجی سیکیورٹی اور بجلی/توانائی کے شعبے میں معاشی مسابقت کو یقینی بنانا ہے۔ اس پلان کے تحت بجلی کو مناسب قیمتوں پر صنعتی اور گھریلو صارفین تک پہنچانے کے حوالے سے حکمت عملی بھی ترتیب دی جائے گی۔ مزید برآں کم کاربن اخراج دینے والی توانائی اور بجلی کی پیداوار، ماحول دوست اور موسمیاتی تبدیلیوں سے مطابقت رکھنے والے توانائی ذرائع کو فروغ دیا جائے گا۔
کابینہ کمیٹی برائے توانائی کو پاور ڈویڑن کی جانب سے پاور سیکٹر میں گردشی قرضے کے حوالے سے مالی سال 2025ـ2026 کی رپورٹ پیش کی گئی۔ کابینہ کمیٹی برائے توانائی کو پیٹرولیم ڈویڑن کی جانب سے گیس سیکٹر کے گردشی قرضوں برائے مالی سال 2025ـ2026 کی رپورٹ بھی پیش کی گئی۔